CCXIII.

1349, Februar 26. Frankenstein.

Der Hauptmann des Frankensteiner Gebietes, Heinrich von Haugwitz, bezeugt, dass Kunad von Reibnitz auf das Jus provinciale in den Besitzungen des Klosters verzichtet.

Nos Heynricus de Hugewicz capitaneus districtus Frankinsteynensis per illustrissimum dominum Karolum regem Romanorum constituti tenore presentium notum facimus universis et singulis, quibus nosse fuerit oportunum, quod cum inter dominum Sygehardum abbatem mona­sterii Kamencz et Cunadum de Rybenicz pro iudicio provinciali in bonis et in villis dicti monasterii disceptationis materia in iudicio spirituali diutius verteretur, tandem idem Cunadus consi­derata ratione ad informationem plurimorum virorum sapientum infrascriptorum et precipue Peiczchonis de Cunczindorf, qui huius dissensionis ac discordie ex utraque parte, tam domini . . abbatis, quam Cunadi amicabilis compositor et arbitrator extiterat, omni disceptationi, actioni, inpetitioni, arrestationi, iurisdictioni tam pro se, quam pro suis heredibus bona, mera ac libera voluntate, libere et absolute renuntians omne suum ius sive iurisdictionem, quam in predicto provinciali iudicio, quod a bona dicti monasterii Kamencz habere posset, simpliciter propter deum ac in remedium anime sue, prefato monasterio Kamencz perpetuis temporibus habendum et possidendum coram nobis publice resignavit, nostro beneplacito accedente simul et assensu. In cuius rei testimonium presentibus nostrum sigillum est appensum. Actum in Frankinsteyn quarto Kalendas Marcii anno domini millesimo trecentesimo quadragesimo nono; presentibus hiis testibus: Gelfrado dicto de Sterczce, Gunthero dicto Sabey, Nicolao de Ranccow militaribus; Truchlino Pistore, Kerstilino, Synderamo et Thoma genero Petri Henningi, consulibus tunc in Frankinsteyn; Niccillino dicto Berwici cive ibidem cum aliis pluribus viris ydoneis et honestis.

Or. Perg. Mit dem S. (Widderkopf) des Heinrich von Haugwitz an einem Pergamentstreifen.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.